Kea 'a 'nynɩ "bɛi ɛmɛ ‑seie ‑aʋn
66
'Dʋ ‑wlʋa 'e 'dʋ ‑jeopoi 'a 'sbɛ 'di ɛ.
Ao kpa wlu "jɛi ao 'je Kea 'a 'nynɩ "i 'bɛɛ‑
aomɔ nyʋ "klein ‑nɩa 'e 'blʋa 'di ɛ.
2 Ao ‑sɛ 'nynɩ 'de ɛɛ' dɛwɔn nɩ ‑tɩ 'ʋn,
ao 'bɛɛ ɛɛ' 'nynɩ "i 'de blewlu 'di.
3 Ao wlu 'de Kea ‑pee ka: ‑ma nʋʋdɩ kɔn ‑tɩ'
'De ‑ma "ikmaa' "juɛi ɛ, ‑ma tʋnyʋ a jaa "jru ja.
4 'blʋa ‑wee'‑ "klein jaa "jru ja 'de ‑ʋn ‑sɔn,
‑wɛe ʋʋa 'bɛɛ‑ ‑ma 'nynɩ "i 'de blewlu 'di. ‑Te' ‑kwlʋ.
5 Ao ji ao 'je Kea 'a nʋʋdɩ 'je,
ɛɛ' nʋʋdɩ kmai" 'de nyiɔ ‑pee.
6 Ɛ pooɛ 'tɔniɛ fai" ɛ je "kpaa jriɛ 'ʋn ‑snɛɛ,
‑wɛe nyʋ cɛɛn "ni ‑gbuu 'blʋɔ‑,a
ɛmɛ ‑tɩ ‑aa nʋ 'mʋa‑ 'de ɛ 'ʋn.
7 Ɛɛ' "ikmaa' 'ʋn mɛ ɛɛ poo 'blʋa ‑je o,
ɛɛ' "jri nɩɛ 'e 'blʋa ‑wee'‑ "klein "kpei:
‑bo ɛ nɩ kan' ‑wɛenyʋ ‑ʋʋ toɛ wɔn o
'jeɛ "juɛi nyna‑ ‑Te' ‑kwlʋ.
8 'Blʋadinyʋ ‑wee'‑ 'bɛɛ Kea 'a 'nynɩ "i,
ao ble ao 'je Kea 'nynɩ ‑sa.
9 'De ɛɛ' 'saaʋn mɔ ‑a ‑nɩ 'kmʋ,
ɛ se 'wɔn ‑aa bʋ se ‑gbie'‑.
10 'Oo Kea, ɛ ‑tɩn' ‑a i 'mɛ,
ɛ ‑sa ‑a ‑flɛn" i ka nyɔ ɔ ‑sa nɩɩɛ ‑flɛn" 'ʋn ɛ.
11 ‑A ‑kpa 'de ɛɛ' 'sai 'di,
‑wɛe ɛ ‑tea' kwaku ‑gbɛ "jru.
12 ‑Ɩn ‑ta" i ‑aa tʋnyʋ "i ʋʋ je ‑a 'kle ‑tu".
‑Ɩn ‑jaaʋn 'de nɛ ke "ni 'ʋn, 'kaa ‑ɩn ‑saʋn
'de ‑mɩ ‑wee'‑ 'di 'mɛ ‑wɛe ‑ɩn ‑nʋaʋn 'dɔe "jrii.
13 'Ma kpa 'ma 'sraadɛ 'de ‑ma ‑gbu" 'di,
‑wɛe wlu 'ɩn cɛan ‑tie" 'ɩn 'jeɛ nʋ,
14 ‑ta 'ɩn nɩa 'e 'kle 'di wlu 'ɩn cɛan ‑tie" ɛ, ɩmɩ 'ma nʋ.
15 Nɔ" dɩ ‑tɔe o, 'blaa ‑gblɔɔ' 'cna o,
bli' ‑tɔe o, ‑faan" ‑gbae mɩ 'ma ‑saa 'sraa 'ʋn 'ma "nyɩ ‑ʋn.
Ɩa' muɩ" ‑wee'‑ "klein mɩ
‑ɩa dao' a mu mamaʋ ɩa jɛɛ‑ ‑mɔ Kea. ‑Te' ‑kwlʋ.
16 Ao nyʋ ‑a pleea Kea a, ao ji,
dɩ ɛ nʋa 'de 'ma ‑tɩ' 'ʋn ɛ,
'ma muɩ 'tmʋa 'de ao ‑pee.
17 ‑Ta 'ma poɛ ‑tooi" ɛ,
ɛɛ' 'nynɩ "i 'bɛɛa' nɩɛ 'de 'ʋn 'wɔn.
18 ‑Bo 'ma sea tɔ' saʋn i naa 'de ɛ,
‑mɛ Kea seɛ 'bɛɛ‑ ɛ 'je 'ma wlu doun" o po.
19 'Kaa ao ‑gbʋn Kea kpʋn 'ma wlu 'mɛ,
ɛ poɛ 'ma baewlu doun" o.
20 "Diwan kpʋn Kea, ɛ se 'ma beawlu
doun" i ‑saa, ɛ se 'ʋn ɛɛ' nyiɔɔ' ‑tɩ' kmaa' mlian‑.